प्रचण्ड सरकार धर्मराउन थालेको मधेसी मोर्चाको शंका, यस्तो रहेछ कारण
मोर्चाको माग सम्बोधनका लागि भन्दै पुस २४ गते व्यवस्थापिका संसद्मा संविधान संशोधन विधेयक टेबुल गराएको सरकार सोही विधेयकका कारण धर्मराउन थालेको मोर्चाको बुझाइ छ ।
प्रचण्ड नेतृत्वको सरकारले पनि आफ्ना माग पूरा गर्ने सम्भावना टर्दै गएको निष्कर्षमा मोर्चा नेताहरू पुग्न थालेका हुन् ।
संशोधन विधेयमा प्रमुख प्रतिपक्षी एमालेलगायतका दलले गरिरहेको विरोध र सत्ता गठबन्धनका दलहरूभित्रैको असन्तुुष्टि सरकार धर्मराउनुको कारण भएको मोर्चाका एक नेताले बताए ।
केही समयअघि मात्रै सत्ताघटक राष्ट्रिय प्रजातन्त्र पार्टीले राजनीतिक नियुक्ति, मन्त्रिपरिषद् विस्तार, राजनीतिक संवादलगायत विषयमा कांग्रेस र माओवादी केन्द्रले एकलौटी गरेको आरोपसहित जुनसुकै बेला सरकारबाट बाहिरिन सक्ने भन्दै आफ्ना मन्त्रीलाई तयार रहन निर्देशन दिएको थियो ।
दुई राप्रपा एक भएसँगै राप्रपाले सरकारमाथि दबाब बढाउँदै लगेको छ । गत शनिबार प्रधानमन्त्रीले बोलाएको चारदलीय बैठक राप्रपाले बहिष्कार गरेको थियो । केही दिनदेखि राप्रपा अध्यक्ष कमल थापाले उपप्रधानमन्त्रीसहित दुई मन्त्री नपाए कांग्रेस–माओवादी केन्द्रका शीर्ष नेतालाई आफूहरू सरकारबाट बाहिरिन सक्ने चेतावनी दिँदै आएका छन् ।
राप्रपाको चेतावनी, एमाले अध्यक्ष केपी ओली र कमल थापाले सुरु गरेको सरकार परिवर्तनको चलखेलका कारणले पनि मोर्चाका नेताहरू सरकार कमजोर बनेको निष्कर्षमा पुग्न थालको स्रोतको दाबी छ । कांग्रेसले निर्वाचनका विषयमा दोहोरो चाल चालेर सरकारलाई अस्थिर बनाउन खोजेको गुनासो गरेका छन् ।
बालुवाटारमा मंगलबार बसेको माओवादी केन्द्र, कांग्रेस र मधेसी मोर्चासँगको बैठकमा प्रधानमन्त्री प्रचण्डले नहुने चुनाव भन्दा सत्ता त्याग्छु भनेपछि मोर्चा थप सशंकित बनेको बताइएको छ । बैठकमा सहमतिबिना निर्वाचन घोषणा नहुने र निर्वाचन घोषणा गर्नैपर्ने बाध्यता आए नहुने निर्वाचनको मिति घोषणा गर्नुभन्दा मेरो लागि सत्ता त्याग्नु उत्तम हुने बताएका थिए ।
सरकार संकटमा रहेको निष्कर्ष निकालेका मोर्चा र संघीय गठबन्धनका नेताहरू नयाँ शक्तिलगायतका दलहरूसँग मिलेर ‘महागठबन्धन’ निर्माण गर्ने पक्षमा देखिएका छन् । मोर्चासँगको छलफलअघि गत शनिबार तीन दलले निर्वाचनको विषयमा भएको विषयमा सैद्धान्तिक सहमति भएपछि गठबन्धनका नेताहरूको मनमा चिसो पसेको थियो ।
सरकारले गठबन्धनसँग एकथरी अनि प्रमुख प्रतिपक्षीसँग अको थरी कुरो गरिरहेको उनीहरूको बुझाइ छ ।
यद्यपि मंलबारको बैठकमा तीन दलले निर्वाचनका विषयमा गरेको सैद्धान्तिक सहमतिलाई आशंका नगर्न र मोर्चाको सहमतिमै निर्वाचनको मिति घोषणा गर्ने सत्तारुढ दलले आवश्वासन दिएपछि मोर्चाका नेताहरू केही आश्वस्त भएको बुझिएको छ ।
यद्यपि सरकारले धोका दिए आन्दोलनका लागि महागठबन्धन बनाउने तयारी भने भइरहेको छ । थरुहट तराई पार्टी नेपालका अध्यक्ष भानुराम चौधरीले सरकारले संशोधनविनै निर्वाचनको मिति घोषणा गरे आन्दोलनको तयारीस्वरूप महागठबन्धन बनाउने तयारी भइरहेको सुनाए ।
सरकार धर्मराउन लागेको राजनीतिक संकेत देखिन थालेकाले आदिवासी जनजाति महासंघलगायत संगठन र राजनीतिक दलहरूसँगको सहकार्यमा महागठबन्धन बन्न सक्ने उनले जानकारी दिए ।
0 comments
प्रतिकृया दिनुहोस